Thomas Weber - Fotografía

Idioma:
alemán inglés español árabe sefardi


Walker Evans: Farmer´s kitchen
Walker Evans: Farmer´s kitchen
Walker Evans: Sharecroppers family
Walker Evans: Sharecroppers family
Granada Albaycin 2007
Granada Albaycin 2007

Mi eksperiencia importante fue el lavoro de Walker Evans. Asigun mi punto de vista, la imajen interior de Farmer´s kitchen, Hale County, Alabama (1936) amostra una kamareta perfektamente iluminada, ama si es mirada kon mas detenimiento se observa que la tovaja esta enkolgando de un simple klavo, i ke es una provre kaza rurala fakta de tavlas. Es entonses kuando la provedad se aze evidente. Otra imaje es el portreto perfekto de una famiya en su ogar. Todos los miembros amostran fachas demakradas i solo el mas mansevo esta sonriendo. La kriaturika no komprende la miseria ande nasio i de la ke nunka se fuyira. Walker Evans, ansi ke otros artistas, resivio de la Farm Security Administration de los EE UU la demanda de dokumentar las kondisiones de vida dezastrosas del medio Oeste turante la Gran Deprezion. Kon eyo, las personas deverian motivarsen para no akseptar dichas kondisiones de vida inumanas. La famoza istoria de Las uvas de la furia, eskrita por John Steinbeck, en 1939, fue llevada al sinema de la mano de John Ford, un anyo despues de estas politikas. Es muy interesante ver komo William Christenberry, ke avia sido haver de W. Evans, vijito los mizmos lugares i los dokumento, esta vez en kolor. Es espantozo ver komo su ovra aktuala amostra la mizma bela, siendo ke no troko muncho.

Desde el punto ke komprendi la kompleksidad de las fotografias de Walker Evans, admiro su kritica sutil de la ofenza social.

Walker Evans apartiene a los reprezentantes del muevo Realizmo en EE UU. Ya me avía imprezionado poko antes otro de sus integrantes, Ansel Adams. Reconosido komo el fotografo de paisajes mas famozo de EE UU, desvelopo el Zone System al empesijo de la dekada de los kuarenta del siglo pasado. Su teknika esta disenyada para kontribuir a azer real la fotografia planeada kon antelasion en la mente mediante la ekspozision prechiza (Fred Archer fue otro de los inventores del Zone System). Me fashino mi inkursion en el Zone System por la inkreible kalidad teknica ke puedo alkansar agora i ke reperkutio en mi ovra. Komensi a respektar las kozas simples en mis fotografias.

El sigiente impulso lo obtuvi de los poetas del Realizmo Majico, ke fueron los reprezentantes de esta tendensia en el kampo del arte latinoamerikano. El primero fue Miguel Ángel Asturias. En su ovra Ombres de Maiz (1949), konekto la realidad vizible kon los mitos de los indios maya de Sentroamerika de modo ke kreo una mueva realidad. El premio Nobel, Gabriel García Márquez, el prinsipal, kuenta kon la mijor reputasion en tratandose de eksprimarse en espanyol halis. Afilu ke para mi fue Carlos Fuentes ken me dio un muevo impulso dsizivo a traverso de su narrasion Chac-Mool (el dio de la luvya de los mayas). Kuando meldi las palavras delkavo de Chac-Mool komprendi de una manera majica ke lo invizible i enigmatiko eran una realidad ke duvia akseptar.

En mi pajina Web ay munchas fotografias del sur de Espanya. El motivo ke me hizo tornar la mirada verso Andalusia fue el romanso istoriko La solombra del granado (1992) de Tariq Ali, onde deskribe la dekadensia de Al-Andalus que kavzo la movilizasion del mundo islamiko para enkargarsen de la Andalusia. Granada, el delkavo redukto muzulman en la Espanya, fue konkistada por los Reyes Katolikos (Fernando de Aragon i Isabela de Kastilya) en 1492. Esta koeksistencia sola ansi ke relativamente pazifiza entre muzulmanos, djudios i kristianos arivo a su fin despues del progresivo dezvelopamiento del radizalizmo de todas las vandas.

La fotografía enkuadrada en la vanda derecha amostra un balkon del Albaycín, el antiguo sentro arabo de Granada. Al empesijo puede imprezionar la interferensia atmosferika de la luz i las solombras, ama ay mas. Un balkon al deskubierto, las rejas adientro de un espasio estrecho. ¿Ke es kualo ocultan las rejas i sus solombras ke paresen formar un todo? La repuesta esta en el orijin arabo de esta antigua metropolis. Reflekta el empesijo de ver ama no ser visto, el harem. Amostra de una manera majica ke el pasado arabo sige estando prezente en Al-Andalus.

Ansel Adams me izo deskobrir el potensial de la perfeksion teknika i el respekto por las kozas simples. Walker Evans m’ambezo a bushkar la eksprezion en multiples nivelos i los otores del Realizmo Majiko a konektar lo vizible con la realidad okulta.

P.S.: La biografia relativa a estos temas se topa en "Enlases y Biografia"

© Thomas Weber 2010 - 2017