Thomas Weber - Fotografia

Idioma:
english spanish arabic sefardi


Tres culturas formaron Al-Andalus.

Quería mostrar respeto a las tres culturas y enseñar mi página web en sus distintas lenguas.

español Español
arabisch Árabe
sefardi Sefardí / Ladino

Bien venida

Tres kulturas krearon Al-Andalus ... Aprovare de eksplikar al lektor la kavza de este omaje ke esto aziendo a traverso de mi fotografia i su raporto kon la aktualidad.

La fotografia kale ke sea siempre un proseso de entendimiento. Interpretar kualo se topa esta bazado en la konosensia, en una mente aprontada, inkluyendo la istoria del tema en kestion. En mi opinion, este aprontijo ayuda a respektar la kultura ansi ke sus ekspresiones, ke es kualo se ve.

Ay algo mas fashinante en la tierra ke la Alhambra de Granada i sus palasios, ke nos aparesen komo un milagro de las 1001 nochadas? Este kastilyo, regretablemente, ofrese tan solo ke una chika memoria de una epoka ya pasada.

Orijinalmente, Al-Ándalus no solo se referava a la Andalucía de oy, ama a lo manko a toda la peninsula Iberika. Los arabos entraron en el año 711 d. C., solo unos 100 anyos despues de ke el Islam fuese proklamado. En unos mezes tomaron el kontrol en esta rejion. Komo reusheron? Bueno, los muzulmanos eran konsiderados komo los ganadores de akeyos tiempos: kon un ritmo inkreible avian konkistado el emisferio oriental del Mediterraneo, en inkorporando las konosensias ANSI ke la erensia de la epoka antigua. En desparte ke munchos kristianos kooperaron i arivaron a konvertirsen al Islam basho sierta prezion, lo ke fue alimentado por la predominansia de la iglesia bizantino- romana, ke impozava sus reglas arespaldadas por el Estado. De otra vanda, la relasion estrecha entre los ritos del Kristianismo oriental primero y el Islam kontribuyo a la konversion de la djente.

Ama, desde el empesijo, la konkiista de la peninsula iberika amostro una situasion espesiala: los arabos avian sido apoyados por los Sefaradim, la populasion djudia. Su eksperiensa kon los kristianos del reino Visigodo les empusho a entregar informasion vitala sovre los konfliktos politicos internos del reino de los Godos. Eyos partisiparon en la konkista con asistensia militala, avrieron las puertas de algunas sivdades komo la kapital Toledo, i puede ser ke les ofresieron ayudo finansiario. Imajinar oy Israel i los Estados muzulmanos en kooperando en la politika i en la aksión milital...! Es impensable!

En akeyos tiempos, los muzulmanos avian sido muy i muy tolerantes kon djudios i kristianos. El profeta Muhammad era muy konsintiente de la estrecha relasion entre las relijiones desendientes de Avraam Avinu. Malgrado ke esta toleransia no deve ser konfuzada kon un “laissez-faire”. Es vedra ke los muzulmanos prezionaron mas o menos a los demas a konvertirsen o a lo manko a kontinuar el modo de vida arabo. Este fue tan fashinante ke la relijion pedrio parte de su influensa i rolo komo identifikasion personala. De mizmo Al-Ándalus estava adresada a ser una sosiedad moderna.

Una vez ke el delkavo areskapado de los Omeyas, Abdul Rahman, se fuyo a la Espanya en el anyo 756, la epoka mas esplendorosa de Al-Ándalus komenso, lo que yevaria despues a la separasion del resto del mundo muzulmano, fakto demostrado finalmente por la proklamasion del Kalifato de Córdoba. Las bibliotekas de Córdoba i Sevilya fueron konsideradas en akeyos dias komo la mas mijor fuente de sensia i konosensia, i hahamim de distintas fe i relijiones venian de toda la Evropa. Ama los Omeyas fueron rekodrados por las jenerasiones muzulmanas sigientes komo "la rama pudrida del arbol sagrado del Islam". Unos 250 anyos mas tadre, los bereberes ekstranyeros de la Africa del nord kon una radikal kreensia islamika no solo ofresieron ayudo milital para protejarsen kontra los kristianos, sino ke i destruyeron el konsepto de esta sola sosiedad liberal.

Al-Andalus no podia kompetir kon el rigor del reyno de Kastilya. Dizenyado por la kleresia franseza, se dezvelopo para ser el primer estado moderno de tipo territorial: un governo sentral, una area serrada, una lingua komun, una relijion o ideolojia i un servisio sekreto -la Santa Inkizision- ke mantiene basho el kontrol ke la djente guadra sus doktrinos. Esto i el dezvelopamiento del lado muzulmano kavzo la sola i relativa ko-eksistensia pasifika para eskapar progresivamente kon el radikalizmo desvelopado de las dos vandas.

Bueno, ¿kualo akontese oy en dia? La falta de toleransia difikolta la "fotografia de la kaleja", i los konfliktos legales son un obstakolo para la fotografia de oy. Al-Ándalus. puederia ofresermos una reminisensia de una kultura pasada, no a traverso de la imitasion, sino ke desvelopando la idea del respekto mutuol.

Bibliografia

Colton-Sonnenberg, Ana: Convivencia in Al-Andalus: Vorbild oder Mythos? Paderborn, 2007.

Martinez Sanz, José L.: Al-Ándalus, Los Árabes en España. Madrid, 2007.

Menocal, María Rosa: The ornament of the world, how Muslims Jews and Christians created a Culture of Tolerance in Medieval Spain. Boston, New York, London, 2002.

© Thomas Weber 2010 - 2017